პორტუგალიის დედაქალაქში ფუნიკულიორის ავარიის შედეგად 16 ადამიანი დაიღუპა. გადარჩენილებს შორის კი არის სამი წლის გერმანელი ბიჭუნა – როგორც ცნობილია, ბიჭის მამა გარდაიცვალა, დედა კი 20-ზე მეტ დაშავებულს შორის არის.
- პოლიციის ცნობით, დაღუპულებს შორის არიან პორტუგალიის, სამხრეთ კორეის, შვეიცარიის, კანადის, გერმანიისა და უკრაინის მოქალაქეები.
ჯერ კიდევ გაურკვეველია, თუ რამ გამოიწვია ავარია. დედაქალაქის საზოგადოებრივი ტრანსპორტის ოპერატორმა, Carris-მა, განაცხადა, რომ ყველა ფუნიკულიორი შემოწმდება, მათივე თქმით, საქმეზე დამოუკიდებელი გამოძიება დაიწყო.
პორტუგალიის პოლიტიკური ელიტა ხუთშაბათს საღამოს წმინდა დომინიკის ეკლესიაში დაღუპულთა ხსოვნისადმი მიძღვნილ წირვაზე მივიდა. ეკლესიის გარეთ შეკრებილი მოსახლეობა მთავრობას საფუძვლიანი გამოძიებისკენ მოუწოდებდა.
“ხალხმა უნდა იცოდეს, რომ აქ უსაფრთხოდ არიან“ – თქვა ერთ-ერთმა ადგილობრივმა.
ოთხშაბათს საღამოს ავარიის ადგილზე იმყოფებოდა ტურისტული გიდი მარიანა ფიგეირედო. როგორც მან აღნიშნა, ძლიერი ხმა გაიგონა და ავარიის ადგილისკენ გაემართა:
“ხუთ წამში იქ ვიყავი. ხალხი გორაკის ძირში, ფუნიკულიორის ფანჯრებიდან ხტებოდა. შემდეგ კიდევ ერთი ტრამვაი დავინახე, რომელიც უკვე დამსხვრეული იყო. ხალხის დასახმარებლად გორაკზე ასვლა დავიწყე, მაგრამ როცა იქ მივედი, ერთადერთი, რაც მესმოდა, სიჩუმე იყო. როდესაც ფუნიკულიორის სახურავის ჩამოხსნა დავიწყეთ, შიგნით ცხედრები დავინახეთ”, – იხსენებს გიდი.
პოლოციამ ოფიციალურად არ დაასახელა დაღუპულთა ან დაშავებულთა ვინაობა.
- პორტუგალიის სატრანსპორტო კავშირმა განაცხადა, რომ დაღუპულთა შორის იყო ფუნიკულიორის სამუხრუჭე მცველი ანდრე ხორხე გონსალვეს მარკესი. საქველმოქმედო ორგანიზაცია “სანტა კასა და მისერიკორდიამ“, რომლის თანამშრომლებიც სამუშაოდ ფუნიკულიორს იყენებდნენ, დაადასტურა, რომ ავარიის შედეგად მათი ოთხი თანამშრომელი დაიღუპა.
ქალაქის ფუნიკულიორის რკინიგზა – გლორია, ლავრა, ბიკა და გრასა – პოპულარული ტურისტული ღირსშესანიშნაობაა. გლორია 1885 წელს გაიხსნა და სამი ათწლეულის შემდეგ ელექტრიფიცირებული გახდა.
